Hibalong

“Yaon sa magayunon na estado ki pagtalubo an literaturang Bikol. Halos, sa kada okasyon sa banwaan, igwang tirigsikan, rawitdawit, pagkanta ki Bikol. Sa kada banwaan man an paglataw kan mga gimatang parasurat na nagheheras kan saindang tali sa paagi kan sadiring tataramon, Pano ki kasiributan an mga grupong cultural ki mga lakdang na dulo pang maparambong kan pagtalubong ini. Minadugang ki kamugtakan an tipon na ini sa sulog kan pag-uswag na ini.”

– Jaime Jesus U. Brolagdan, hale sa Kalapakapa [Panduwang Luwas]

***

Siring sa haloy nang inaandaman na bangraw nin daliwawa matapos mag-agui an mabansayon na matanga, an literaturang Bikolnon danay na minabungkaras ta gud si manga aking Bikolnon mamatean an tunay na gayon kan kulturang sainda man sana. An mga rawit-dawit, orosipon, tigsik, cansion, manga sarabihon, asin kadakol pang iba na minapasilag kan satuyang sadiring tradisyon bilang sarong lahi, totoong makamumuya asin nagtataong daeng sukol na ugma.

An Hibalong, bilang sarong blog, may katuyuhan laen lang na magka-igua nin katiriponan nin mga kahalimbawaan nin literaturang Bikolnon asin maipamidbid an nagkapira kon laen man kadaklan na mga Bikolnong sa sadiring kultura igua nin dakulang pagmakulog.

Hibalong [v. hibal-ong], boot sabihon, ‘ibalyo’ o ‘ihatod’… sarong pagpapahiling nin kamaw-otan na maipadara sa modernong paagi an gayon na igua an satuyang kultura bilang mga Bikolano.

Kuta na, an blog na ini sarong personal na koleksyon nin mga  rawitdawit iba pa sa espesyal na kabtang  kan  sakuyang personal na blog bilang ugbon kan sakuyang pagranga sa literaturang totoo tang sadiri. Alagad, an gayon asin importansiya kan mga ini laen lang pansadiri kaya dapat na inihahatod sa kadaklan asin iniheheras.

Salamat sa mga tawong nagtaong inspirasyon sa sakuya ta gud mas urog ko pang mamot-an an satuyang nagimathan na kultura asin tradisyon. Sa mga gugurang kan Behia [Magallanes, Sorsogon], kay Prof. Boboy Datar sa saiyang pagpadaba sa Bikolnong tradisyon, kay Kristian S. Cordero, sakuyang iniidolo, sa sakuyang amigo na si Eduard Carrascal asin sa kadakol na mga nag-guibo nin rawitdawit na sa blog na ini sakuyang inientra.

Alphredite ™